Башҡортостанда Евразия иҡтисади союзы илдәре тормошҡа ашырған «Агроэкспресс» тиҙләтелгән тимер юл һәм мультимодаль ташыуҙарҙы тормошҡа ашырыу буйынса берлектәге проект сиктәрендә күмәртә-бүлеү үҙәге булдырыла.
Петербург халыҡ-ара иҡтисади форумында Башҡортостан Хөкүмәте менән «Евразия Агрологистикаһы» агросәнәғәт эшмәкәрлеген үҫтереүгә булышлыҡ итеү буйынса автономлы коммерцияға ҡарамаған ойошма араһында ҡул ҡуйылған килешеү ошо проектты тормошҡа ашырырға ярҙам итәсәк.
«Агроэкспресс» проекты - «Рәсәй тимер юлдары Логистика» һәм «Рәсәй экспорт үҙәге» акционер йәмғиәттәренең Рәсәйҙең тиҙләтелгән контейнер поездары ярҙамында Ҡаҙағстанға, Үзбәкстанға, Иранға һәм Яҡын Көнсығышҡа аҙыҡ-түлек оҙатыу буйынса махсуслаштырылған сервисы. «Евразия Агрологистикаһы» Башҡортостанда күмәртә-бүлеү үҙәген төҙөү һәм үҫтереү проектын тормошҡа ашырыуҙа, шулай уҡ логистик инфраструктура һәм эш урындары булдырыуҙа ҡатнаша.
«Агроэкспресс» инвестиция проектын тормошҡа ашырыу Башҡортостан иҡтисадына 8 миллиард һум самаһы аҡса йәлеп итергә, шулай уҡ 100 эш урыны булдырырға мөмкинлек бирәсәк. «Төньяҡ-Көньяҡ» халыҡ-ара транспорт коридоры маршруттарында тышҡы сауҙа, транспорт һәм логистика өлкәһендә, шул иҫәптән агросәнәғәт комплексы продукцияһын һәм сәнәғәт продукцияһын килтереүҙе камиллаштырыу, башҡа эштәрҙе һәм хеҙмәттәрҙе алға ебәреү маҡсатында хеҙмәттәшлек нығытыласаҡ.