Тилбер ҡулдар тау аҡтара

Халҡыбыҙҙың боронғо йолаларын тергеҙеү, киләсәк быуынға еткереү маҡсатында Алға ауылы мәҙәниәт йортонда «Кис ултырыу» байрамы үткәрелде. Һарыҡ йөнөн эшкәртеү бик мәшәҡәтле, ҡатмарлы шөғөл булһа ла, ауылым уңғандары ул эште ҙур ҡәнәғәтләнеү, күтәренке кәйеф менән баш­ҡара. Байрамда ошо ауылдан ике команда - «Алға» һәм «Маяҡ» командалары бер- береһе менән ярышты. Баһа­лама ағзалары һайланғас, ко­мандалар йыр­ҙарын, девиздарын тәҡдим иттеләр. Беле­үебеҙсә, тәүҙә йөндө мамыҡ кеүек йомшаҡ итеп тетергә кәрәк. Ошо конкурс башланыр алдында ике команданан берәр кеше – Әнисә Хәби­рова һәм Гүзәл Сәлихова һикегә сәскә бәйләргә ултыр­ҙы. Хәлиҙә Солтанова һәм Зилә Ҡаһар­мановалар йөн теткән арала, командалағы апай­ҙар күмәкләп таҡмаҡтар йырланы. Рәшиҙә Минекәй һәм Лилиә Ғәйнет­динова апайҙар әҙер йөндө Алмаз Ғәзи­зов­тың ҡурай моңдары аҫ­тында кемуҙарҙан егєрләп тә ҡуй­ҙылар. Йөн ебе уратылған орсоҡтарҙы баћалама аѓзаларына тапшырғас, өсөнсө конкурс – сиратыу башланды. Фәрзимә Фазы­лова һәм Ми­нелиә Тимер­баевалар күмәк йыр барышында һә тигәнсе орсоҡтарҙы бейетеп, сиратып та ҡуйҙылар. Рә­шиҙә Мине­кәй һәм Фәрзәнә Хәсәншина йөндө аяҡлап, йыуып ҡуйған арала тамашасылар Минелиә Тимер­баева башҡарыуында мөнәжәт, Фәр­­зимә Фазылова башҡарыуында «Сәлимәкәй» йы­рын тыңланы. Бәйләм бәйләүҙә Зилә Ҡа­һармановаға тиңдәр табылманы. Коман­далар бәйләгән әйберҙәрен бергәләп күрһәтте.

Фәрзәнә Хәсәншинаның моңло йырҙары, «Ҡоҙаса» скетчы алҡыштарға күмелде. Күңелле ярышта баһалама ағзалары ике команданың да өлгөр булыуҙарын, дуҫлыҡ еңеүен белдерҙе. Театр йылы айҡанлы байрам һуңында тамашасыларға Мостай Кә­римдең «Ҡыҙ урлау» музыкаль комедияһынан өҙөк күрһәтелде.