Ҡоролтайға әҙерлек бара

Дәүләкән районында V Бөтә Донъя башҡорттары ҡоролтайына әҙерлек сиктәрендә күп мәҙәни саралар үткәрелә. Район башҡорттары ҡоролтайының сираттағы ултырышында делегаттар һайланды. Делегаттар районыбыҙҙың төрлө өлкәләрендә хеҙмәт һала. Улар араһында республика кимәлендә танылыу яулаған яҡташыбыҙ, шағирә Ш. Бабич исемендәге премия лауреаты Лариса Хашим ҡыҙы Абдуллина ла бар.

Быйыл районыбыҙҙа беренсе тапҡыр Яҡшығолов уҡыуҙары төбәк-ара конкурсы үткәрелде. Унда район вәкилдәре ҡатнашты.

Башҡортостан дәүләтселеген ойоштороуҙа әүҙем ҡатнашҡан Дәүләкән еренең арҙаҡлы шәхестәре Сафуан Яҡшығолов, Шакир Мозафаров, Юлмөхәмәт Арҫланбәков иҫтәлегенә асылған таҡтаташ V Бөтә Донъя башҡорттары ҡоролтайына ҙур бүләк булды тип иҫәпләйбеҙ.

Башҡорт теленән халыҡ-ара диктант районыбыҙҙа ойошҡан рәүештә үтте. 763 кеше үҙ белемен һынап ҡараны.

Ҡоролтайға әҙерлек барышында ҡала һәм ауылдарыбыҙ төҙөкләндерелә, район хакимиәте тарафынан был мәсьәләгә айырым иғтибар бүленә. «Матур ауыл» конкурсына районыбыҙҙың бөтә ауылдары ҡушылды.

Башҡорт теленә һөйөүҙе бала саҡтан тәрбиәләү маҡсатында ҡалабыҙҙың ун икенсе «Ҡарлуғас» балалар баҡсаһында уҡытыу-тәрбиә эштәре башҡортса алып барыласаҡ төркөм асырға планлаштырабыҙ.

V Бөтә донъя башҡорттары ҡоролтайы һәм Республикабыҙҙың 100 йыллығына бағышланған сараларҙың иң күләмлеһе-мең ырыуы башҡорттарының йыйыны. Сара 6 июлдә районыбыҙҙа үтәсәк. Был йыйында мең ырыуы вәкилдәре йәшәгән райондарҙан ҡатнашыусылар көтөлә.