Үҙ тауышыңды бир

Гражданлыҡ бурыстарын үтәп лайыҡлы кандидат өсөн тауыш биреүҙә оло быуын вәкилдәре бик әүҙем ҡатнаша. Быны улар көндөң тәүге яртыһында эшләргә тырыша, һуңынан инде үҙҙәренең йорт һәм хужалыҡ мәшәҡәттәренә тотона. Ә бөгөнгө ҡоро, ҡояшлы көн баҡсала эшләү өсөн генә тиерһең!

Йәштәр ҙә ололарҙан ҡалышмай, йылдың-йылы йәмәғәт тормошонда, төрлө йәштәр ойошмаларының эшмәкәрлегендә әүҙем ҡатнашып, үҙҙәренең гражданлыҡ позицияһын һайлауҙар барышында белдерә.

- Һайлауҙарҙа һәр саҡ ҡатнашам. Был бик мөһим эш һәм унда ҡатнашыу-минең гражданлыҡ бурысым, сөнки беҙҙең, балаларыбыҙҙың киләсәге минең тауышымдан да тора,- тип фекере менән бүлеште ике мәктәпкәсә йәштәге балалары булған ғаилә башлығы Динар Фазылов.

1709-сы һайлау участкаһына 20-ләп урамда йәшәгән 1300-гә яҡын һайлаусы инә. Уларҙың күбеһе - оло йәштәгеләр. Төрлө сәбәптәр йәки һаулыҡтары торошо арҡаһында һайлау участкаларына килә алмағандарға участка һайлау комиссияһы ағзалары күсмә урналар алып, йорттарына бара.

Иң йәш һәм иң оло йәштәге һайлаусыларға бүләктәр, ә ҙурҙарға эйәреп килгән балаларға тәмле шоколадтар әҙерләнгән.