Өфө ҡалаһында судьялар араһында саңғы ярыштары үтте

Ярыштар йыл һайын уҙғарылып тора. Быйыл уны Бөйөк Ватан һуғышында Еңеүҙең 75 йыллығына бағышланылар.

Судья Алексей Малинин саңғы ярыштарында етенсе йыл ҡатнаша, ә коллегалары араһында икенсе йыл ярыша. Мәсетле районының мировой судьяһы бөтә буш ваҡытын спорттың тап ошо төрөнә бағышлай. Фемида хеҙмәткәрҙәре араһында 2017 йылда үткән саңғы ярыштарында ул көсөн тәүге тапҡыр һынап ҡарай. Унда Алексей призлы урындар яулай алмай, әммә бөгөн иһә иҫәбе – бары тик еңеү.

Был көндө республиканың 97 судьяһы суд сүкештәрен саңғы таяҡтарына алыштырыуҙы хуп күрҙе. Ата-әсәләренең әүҙем ялдарына балалары ла ҡушылды, сөнки яңғыҙ ярыштарҙан тыш, йәш спортсылар араһында ла турнир ойошторолдо.

1 саҡрым араны өс минут та 48 секундта үтеп, Алексей Малинин суд системаһы хеҙмәткәрҙәре араһында шәхси рекорд ҡуйҙы.

Судьяларҙы ойоштороу комитеты ағзалары баһаланы. 10 кеше ярыш ҡағиҙәләренең үтәлешен тикшерҙе. Күмәк старт тамамланғандан һуң 10 минутлыҡ ял бирелде. Артабан командалар араһында эстафета ярыштары башланды.

Унда бөтәһе ете команда ҡатнашты. Һәр береһендә - ике ир-егет һәм ике ҡатын-ҡыҙ. Пьедесталға бик аҙҙар ғына күтәрелде.

Беренсе урынды Яңауыл, Өфөнөң Дим районы һәм республиканың Балаҡатай районы судьяларының йыйылма командалары бүлеште. Һуңғы команда составында рекордсмен Алексей Малинин да бар. Көмөш – Өфөнөң Киров районы судының Фемида хеҙмәткәрҙәрендә, ә бронзаға Күмертау командаһы лайыҡ булды.

BASH.news агентлығы мәғлүмәттәренән.