Дан һәм абруй ҡаҙанған

Дәүләкән ҡалаһы һәм районының Почетлы гражданы Ғәйшә Мостафа ҡыҙы Әкимбәтова барыбыҙ өсөн дә өлгө булып тора. Ҡыҙрас ауыл Советы ауыл биләмәһендә ул иң хөрмәтле кешеләрҙең береһе. Оло йәштә булыуына ҡарамаҫтан, ул әле лә сафта – аҡыллы кәңәштәрен ишетер, фәһемле һүҙҙәрен күңеленә һеңдерер өсөн ауылдаштары йыш ҡына уға мөрәжәғәт итә. Биләмәлә үткәрелгән сараларҙа Ғәйшә инәй йәштәргә үҙенең күргән-белгәндәрен мөмкин тиклем күберәк һөйләп ҡалырға тырыша, берҙәм булырға, матур йәшәргә өндәй. Башҡаса булыуы ла мөмкин түгел, бай тормош тәжрибәһе туплаған, ауырлыҡтарҙа сыныҡҡан быуын вәкиле бит ул.