-11 °С
Облачно
Антитеррор
Все новости
ЙӘМҒИӘТ
14 Августа 2020, 19:40

Ауыр хәлдә ҡалған кешеләргә ярҙам

Өлкән йәштәге уҙаман өсөн һөйөнөслө хәл булды.

Дәүләкән районында мәрхәмәтлек акцияһы уҙҙы. Уны республиканың сауҙа-сәнәғәт палатаһы ойошторҙо. Әлеге бөтәһе өсөн дә еңел булмаған ваҡытта ул Башҡортостан халҡына ярҙам һәм яҡлау күрһәтеүен дауам итә.
Акция сиктәрендә ҡала һәм райондың айырыуса ярҙамға мохтажлыҡ кисергән кешеләре аҙыҡ-түлек йыйылмалары алды. Тәү сиратта улар килемдәре түбән булған яңғыҙ пенсионерҙарға һәм аҙ тәьмин ителгән күп балалы ғаиләләргә тәғәйенләнде. Аҙыҡ-түлек һалынған тартмалар уларҙың йортона илтеп бирелде.
Йыйылмаларҙың береһе Айыухан ауылында йәшәүсе яңғыҙ пенсионер Рафиҡ Әхмәҙуллинға илтеп бирелде. «Рафиҡ Миңнулла улы ғүмере буйына тыуған ауылында иретеп-йәбештереүсе булып эшләгән, хеҙмәт ветераны, - тип һөйләй ауыл биләмәһе башлығы Рөстәм Шәйхетдинов. – Әле бик бәләкәй пенсияға йәшәй. Һаулығы насар булыу сәбәпле мал-тыуар аҫрай һәм баҡса үҫтерә алмай. Әммә ул яҙмышына зарланырға күнекмәгән. Аҙыҡ-түлек йыйылмаһы сифатындағы бындай ярҙам уға һиҙелерлек ярҙам буласаҡ».
Раев ауыл биләмәһе башлығының килеүе өлкән йәштәге уҙаман өсөн һөйөнөслө хәл булды.
- Иғтибарҙары, ҡайғыртҡандары һәм аҙыҡ-түлек тартмаһы өсөн ҙур рәхмәт, - тип шатлығы менән бүлешә ул. – Бындай оло йыйылманы алып, бик шатландым. Унда бөтә нимә бар, хатта печенье ла һалғандар. Әлеге ваҡытта күрһәтелгән бындай ярҙам минең өсөн бик мөһим. Өйгә килтереп биргәндәре өсөн айырым рәхмәт.
Читайте нас в