9 майҙа ҡалала автойөрөш үтте. Унда яҡынса 80 авмобилист ҡатнашты. Улар «Сандра» сауҙа-сервис комплексы майҙансығынан старт алды. Машиналар хужалары автомобилдәрен флагтар, Георгий таҫмалары һәм башҡа патриотик атрибутика менән биҙәгәйне. Парад колоннаһына мотоциклистар ҙа ҡушылды. Улар бындай сараларҙа даими ҡатнаша.
Быйыл автойөрөш бүтән маршрут буйынса үтте. Ойоштороусылар колонна уҙасаҡ урамдар исемлеген һиҙелерлек киңәйткәйне. Ҡала үҙәген йөрөп сыҡҡандан һуң, автомобилдәр Көньяҡ микрорайонына юл тотто. Артабан Ворошилов урамы аша үтеп, сарала ҡатнашыусылар Высоковольтный урамы буйлап БАМ микрорайонынан ГНС-ҡа тиклем барҙы. Урал урамы хәрәкәттең һуңғы нөктәһе булды.
Дөйөм алғанда, автомобилдәр ун саҡрымдан ашыу ара үтте. Автойөрөш Дәүләкәндә йыл һайын ойошторола. Унда ҡатнашыусылар был йөрөштө Бөйөк Ватан һуғышында ҡан ҡойған яҡташтарына арнай.
Светлана Кәлимуллина.
