«Шүлгәнташ» тарихи-мәҙәни комплексы 4 мең квадрат метрҙа урынлашасаҡ. Музейҙың төп экспозицияһына "Ат һәм билдәләр", "Көнсығыш" һәм "Көнбайыш" паннолары менән мәмерйәләге һүрәттәрҙең аныҡ күсермәләре инәсәк. Экспозицияның төп өлөшөн бер нисә ай дауамында Францияның Монтиньяк ҡалаһында яһағандар һәм 13 көн дауамында автопоезда Бөрйән районына алып килгәндәр. Төп экспозициянан тыш, комплекста ғилми-тикшеренеү комплексы, фонд һаҡлағыс, археология экспонаттары музейы, амфитеатр, төрлө форумдар уҙғарыу өсөн ике конференция залы буласаҡ. Музей комплексы һынау режимында март аҙағында эшләй башлаған. Июль айында ул теләге булған һәр кем өсөн үҙ ишектәрен асасаҡ. Был хаҡтаБашҡортостан телевидениеһының "Хәбәрҙәр" тапшырыуына "Шүлгәнташ мәмерйәһе" тарихи-мәҙәни музей-ҡурсаулығының матбуғат хеҙмәте хәбәр иткән.