Аяҡ-ҡул ҡырҡылып йәрәхәтләнһә

- Йәйгеһен ҡырға сыҡҡанда аяҡ-ҡул ҡырҡылып йәрәхәтләнһә, иң яҡшы дауалау сараһы – сайыр. Көн дә яраға яңы ғына алынған сайыр һөрткәндә, ул бик тиҙ төҙәләсәк. - Яңы өҙөлгән һәм ваҡланған юл япрағы йәрәхәтләнгәндә, тән янғанда ялҡынһыныуға ҡаршы һәм ҡан туҡтатыу сараһы булараҡ ҡулланыла.

- Бөжәктәр тешләгәндә йә саҡҡанда, юл япрағы һутын туҡыма киҫәгенә тамыҙып, зыян күргән урынға ябырға мөмкин. 2 – 3 сәғәт һайын алмаштырып торорға онотмағыҙ. Шулай уҡ бер үк күләмдә юл япрағы менән меңъяпраҡты ваҡлап, яраға ябырға һәм бәйләп ҡуйырға була. Көнөнә 2 – 3 тапҡыр алмаштырырға.

- Танау ҡанағанда меңъяпраҡтың яңы ғына өҙөлгән япрағын ҡулда ыуып, танау тишектәренә ҡуйырға. Шулай уҡ һутын танауға тамыҙырға мөмкин.

- Сиҡандан сей картуф яҡшы ярҙам итә. Уны ҡырғыстан үткәреп, ауыртҡан урынға ҡуйырға һәм 3 – 4 сәғәт һайын яңыртып торорға.

- Йылан тамыры үләненең һыуҙа әҙерләнгән төнәтмәһе ауыҙ сите ҡырҡылып ауыртып торғанда ярҙам итә. Бының өсөн ауыртҡан урынға көнөнә бер-ике тапҡыр ошо төнәтмәне һөртөргә кәрәк.