“Дуҫ өсөн рюкзак”

“Рәсәй уҡыусылар хәрәкәте” 15 августҡа тиклем ошондай акция үткәрә. Ул Иркутск өлкәһендә зыян күргән балаларға ярҙам итеү маҡсатында ойошторола. Илдең төрлө мөйөштәрендә йәшәүселәр Тулун ҡалаһы уҡыусылары өсөн мәктәп кәрәк-яраҡтары ебәрә ала. Өфөлә гуманитар ярҙам йыйыу пункты “Башҡортостан пионерҙары” ойошмаһы бинаһында урынлашҡан. Адресы: Комсомол урамы, 21-се йорт.

“Рәсәй тимер юлдары” компанияһы тупланған әйберҙәрҙе Тулунға алып барырға ярҙам итә. Хәбәр итеүебеҙсә, июнь айында көслө ямғырҙар арҡаһында Иркутск өлкәһенең алты районында ғәҙәттән тыш хәл тәртибе индерелде. 100-ҙән ашыу ауыл һәм ҡаланы һыу баҫты. 10 мең самаһы йорт һыу аҫтында ҡалды. Күптән түгел йылғалар ташып, халыҡ йәнә зыян күрҙе.