«Ашығыс ярҙам» машинаһының юлын тотҡарлаған өсөн ҡаралған яза ғәмәлгә инде

Рәсәйҙә яңы закон ғәмәлгә ашырыла башланы. Уға ярашлы, медицина хеҙмәткәрҙәренә ниндәй ҙә булһа ҡаршылыҡ күрһәтеүселәргә яза ҡәтғиләшә. Тәртип боҙоусыларға 2 йылдан алып 4 йылға тиклем иректән мәхрүм ителеү янай.

Шулай уҡ 6 августан ашығыс ярҙам машинаһына юл бирмәгән автоһәүәҫкәрҙәргә лә штраф күләме 10 тапҡырға артты. Әгәр ҙә был ваҡытта пациенттың һауылғы насарайһа, өҫтәмә рәүештә тағы ла 5 мең һумға тиклем штраф һалына. Хәйер, водителдәрҙең дә үҙ дәғүәләре бар. Улар медицина ярҙамы күрһәтеүсе автомобилдәргә махсус сигнал яндырыуҙарын онотмауҙы һорай.

Марсель Бикташев, ЮХХДИ идаралығының пропаганда бүлеге инспекторы: “6 августан алып “Ашығыс ярҙам” машинаһына юл бирмәү тураһындағы закон ғәмәлгә инде. Уны боҙоусыларға 3 меңдән алып 6 меңгә тиклем административ штраф һалына, йәки алты айға тиклем транспорт йөрөтөү хоҡуғы алына”.