Быйыл 31 декабрь ял көнө тип иҫәпләнмәй

Рәсәйҙең Хеҙмәт һәм социаль яҡлау министрлығынан хәбәр итеүҙәренсә, быйыл йылдың һуңғы көнө ял тип иҫәпләнмәй. Хөкүмәт ял көндәрен күсереү тураһында ҡарарҙарҙы алдан ҡабул итә, тип билдәләне ведомство башлығы Максим Топилин. Был хаҡта ТАСС хәбәр итә.

Уның һүҙҙәренсә, хәҙер һәр эш биреүсенең 31 декабрҙе ял көнө итеү хоҡуғы бар. «Хөкүмәт ял көндәрен киләһе йылға күсереү тураһында ҡарарҙы, ғәҙәттә, октябрҙә ҡабул итә. Был бөтәһе лә үҙ графиктарын төҙөһөн өсөн эшләнә», — тип аңлатты министр.

Ҡануниәткә ярашлы, 31 декабрҙә эштән бер сәғәткә алдараҡ сығырға мөмкин, сөнки иртәгәһенә — байрам.

Бынан алда «Башинформ» ЛДПР депутаттарының 31 декабрҙә ял итеү тураһында закон проектын Дәүләт Думаһына ҡарауға индереүен хәбәр иткәйне. Документҡа аңлатмалы яҙыуҙа билдәләнеүенсә, 31 декабрҙә хеҙмәткәрҙәр, Яңы йылға әҙерләнеү менән бәйле, үҙҙәренең эштәрен тулы күләмдә башҡармай.