Радий Хәбиров тыуған яғына ҡайта алмаған вахтасыларға ярҙам итәсәк

Башҡортостан Башлығы Радий Хәбиров социаль селтәрҙә Алыҫ Көнсығышта аҡсаһыҙ ҙа, эшһеҙ ҙә ҡалған егеттәргә ярҙам итәсәген белдерҙе.

Башҡортостан башлығы был турала хәбәр алыу менән Дәүләт хеҙмәт инспекцияһына һәм Ғаилә, хеҙмәт һәм халыҡты социаль яҡлау министрлығына хәлде асыҡларға, «Өфөнефтемаш» компанияһын тикшерергә ҡушыуын белдергән.

Предприятиела кисәнән бирле тикшереү бара. Ысынлап та, финанс дисциплинаһын боҙоу осраҡтары асыҡланған - халыҡ айҙар буйы хеҙмәт хаҡы ала алмай.

“Ә хеҙмәт ауыр, судно төҙөү комплексында эшләйҙәр. Күптәрҙең иңендә ипотека, йәш атайҙарҙы өйҙә балалары һәм ҡатындары көтә. Уларҙың ҡайтырға аҡсалары ла юҡ. Ярҙам итергә мөмкинлек эҙләйбеҙ. Бындай ғәҙелһеҙлеккә юл ҡуйған предприятие етәкселәренең законға ярашлы яуаплылыҡҡа тарттырылыуын күҙәтәсәкмен,”- тигән Радий Хәбиров социаль селтәрҙә. Башҡортостан башлығы белдереүенсә, вахтаға ай һайын йөҙ меңдән ашыу кеше китә.

”Кемдер – “оҙон” аҡса артынан, кемдер үҙ ҡалаһында йәки ҡасабаһында эш таба алмай. Шуға күрә әйтәм дә инде, републикала эш урындары булдырғандарҙы ҡулда күтәреп кенә йөрөтөргә кәрәк,”- тип тамамлаған һүҙен Радий Хәбиров.

Бөгөн төндә вахтасылар Өфөгә ҡайта. Эш биреүсе уларға самолет билеттары һатып алған. Әммә хеҙмәт хаҡы бер тин дә түләнмәгән. Приморье крайына эшкә киткән 38 егет өйөнә аҡсаһыҙ ҡайта. «Өфөнефтемаш» предприятиеһы етәксеһе аҡсаларҙы Яңы йылға тиклем түләргә вәғәҙәләй.