Рәсәйҙең Милли банкы Башҡортостанда 36 «ҡара» кредитор һәм 11 финанс пирамиданы асыҡлаған

Тәүгеһе буйынса законһыҙ рәүештә халыҡҡа займдар бирелгән. Күп осраҡта граждандар аҡса алғанда күсемһеҙ милекте йә автомобилен закладҡаға һалған. Финанс пирамидаларға килгәндә, улар ҡулланыусылар кооперативы һәм яуаплылығы сикләнгән ойошмалар булараҡ эшмәкәрлек алып барған. Юғары килем, яңы мөлкәт вәғәҙә иткән компаниялар физик шәхестәрҙән ҙур күләмдә аҡса йәлеп итә. Шул уҡ ваҡытта иғәнәләр буйынса йөкләмәләр яңы саҡырылған ҡатнашыусылар иҫәбенә ҡапланған.

Барлыҡ мутлашыу осраҡтары буйынса ла хоҡуҡ һаҡлау органдары тикшереү ойошторған. Финанс баҙарҙа законһыҙ эшләгән ойошмаларҙың әүҙемләшеүенә бәйле бөгөн Өфө ҡалаһы хакимиәтендә Милли банк, прокуратура, суд приставтары ҡатнашлығында ултырыш уҙғарылды. Сара сиктәрендә халыҡтың финанс грамоталығын арттырыу бурысы ҡуйылды.

Финанс ойошманың эшмәкәрлегендә шикләнһәгеҙ, уны Милли банктың рәсми сайтында тикшерергә мөмкин. Шулай уҡ Ҡыҙыу линия эшләй, экранда күрһәтелгән телефон һандары буйынса шылтыратырға була. Әгәр компания Рәсәй Банкы реестрына инмәгән икән, был турала хоҡуҡ һаҡлау органдарына хәбәр итергә кәрәк.