Нефтекама ҡалаһындағы мәктәптә ысын мәғәнәһендә бола сыҡҡан. Ышанырлыҡ та түгел, һигеҙ йәшлектәр араһында ыҙғыш, эҙәрләү, туҡмау күренеше башҡа һыйырлыҡмы ни?
Икенсе класта уҡыусы балаларҙың ата-әсәһе ғәйепте быйыл уҡырға килгән малайҙың тәртибендә күрә. Уларҙың әйтеүенсә, “яңы” уҡыусы башҡаларға тынғы бирмәй, ҡурҡыта, һуғыша, этә-төртә... Баланың әсәһе был нахаҡ һүҙҙәр менән риза булмауын белдерә, киреһенсә, бөтә бәләлә башҡаларҙы ғәйепләй. Улына ҡарата тәүге көндән эҙәрләү, кәмһетеү , рәнйетеү ойошторолоуын билдәләй.Был хаҡта ул дәүләт телевидение һәм радиотапшырыуҙар компанияһына һөйләгән.
”Бер нисә тапҡыр өйгә тиклем эҙәрләп килделәр, таяҡ менән туҡмағандар, мораль баҫым яһағандар...”- тип һөйләй әсә, улы өсөн борсолоп. Әммә ҡаршы төшөүселәр - тотош класс. ”Ул беребеҙгә лә тынғы бирмәй”,-тип зарлана бола күтәреүселәр. Әллә “барыһы ла провокация, ҡотҡо, улымды юрый сығырҙан – сығарырға тырышалар” тип раҫлаған әсә хаҡлымы?
Һуңғы һүҙҙе мәктәп етәкселеге әйтергә, етди мәсьәләне уйлап хәл итергә тейеш.
Фото: Дәүләт телерадиотапшырыуҙар компанияһы