Мөмкинлектән файҙаланып ҡалығыҙ!

Ошо көндәрҙә Республиканың һаулыҡ һаҡлау министры Максим Забелин медицина ойошмалары етәкселәре менән ултырыш үткәргән, унда тармаҡҡа бәйле көнүҙәк мәсьәләләр ҡаралған.

Тәүге сиратта “Инцидент” системаһы буйынса килгән мөрәжәғәттәр тикшерелгән. Бер аҙна эсендә уларҙың һаны 49-ға еткән, төп темалар – медицина ярҙамы күрһәтеүҙе ойоштороу һәм уның сифаты, кадрҙар мәсьәләһе, дарыуҙар тәьминәте.

Медицина белгестәренең республика буйынса күсмә бригадалары эшмәкәрлеге менән өлкәндәргә медицина ярҙамы күрһәтеүҙе ойоштороу бүлеге начальнигы Елена Ғәлимуллина таныштырҙы.

– Былтыр ноябрҙә республиканың медицина ойошмалары белгестәре район һәм ҡалаларға сығып эшләне. Һөҙөмтәлә, 3374 кеше ҡабул ителгән, уларҙың 823-ө өҫтәмә тикшерелеүҙәргә ебәрелгән, 159 кеше стационар шарттарҙа дауаланыуға оҙатылған, 121-е юғары технологиялы медицина ярҙамы аласаҡ, 103 кешенең диагнозы раҫланған, – тине ул.

Ноябрҙән февралгә күсмә ҡабул итеүҙәр 12 тораҡ пунктта тормошҡа ашырылған. Ағымдағы йылдың 27 мартынан табиптар бригадаһы Нефтекама, Ағиҙел, Туймазы, Учалы, Яңауыл, Дәүләкән һәм Благовещенск ҡалаларында эшләйәсәк. Бригада составында нейрохирург, акушер-гинеколог, уролог, колопроктолог, гинеколог-репродуктолог, гастроэнтеролог, пульмонолог, оториноларинголог, өлкәндәр һәм балалар кардиологы, невролог, эндокринолог һәм офтальмолог бар.

Фото: primorsky.ru