Ошо әҙәмдең мутлығынан зыян күргән булһағыҙ, полицияға мөржәғәт итегеҙ

Республика полицейскийҙары аҡсаны алмаштырыу юлы менән кешеләрҙе алдап йөрөгән енәйәтсене тотҡан. 29 йәшлек уҙамандың ҡулдары – тилбер, теле – йор. Әммә ул һәләтен файҙалы ғәмәл өсөн түгел, ә сауҙа нөктәләрен талау өсөн ҡулланған. Полицейскийҙар билдәләүенсә, бына шундай "дөрөҫ булмаған" фокуссының тырышлығынан өс кибет зыян күргән.

Әйтергә кәрәк, иң иғтибарлы һәм һынсыл ҡараш та был әҙәмдең ҡулы артынан эйәрә алмаҫ. Ошонан файҙаланып, ул аҡса алмаштырған да инде. Мәҫәлән, магазинға килеп, биш мең һумлыҡ аҡса һона һәм 300 һумлыҡ тауар ала; һатыусы 4700 һумын кире ҡайтарыу менән ул етеҙ рәүештә өс меңен кеҫәһенә тыға, ә ҡалған 1700 һумын кире һатыусыға ҡайтара: йәнәһе, ул кире уйлаған, тауарҙы һуңыраҡ һатып аласаҡ. Һатыусы ауыҙ асып, хәбәр һатып торғансы, теге сығып та һыҙа, имеш...

Сос әҙәмдең бер ҡорбаны баш ҡаланың Әй урамындағы сауҙа нөктәһендә эшләгән. Әйтеүенсә, алдап киткәндәрен тиҙ генә аңламаған да. Унан һуң, фокуссы бер-ике минуттан кире керергә, бүләк һайлап алыу өсөн улын эйәртергә вәғәҙәләгән дә, имеш. Әммә бурҙан елдәр иҫкән.

Ошондай уҡ хәл Сипайловола кондитер магазинында һәм Туймазы ҡалаһындағы барҙа ҡабатланған. Бында ла "фокуссы" һатыусыларҙы төп башына ултыртҡан. Бәләкәй магазиндар өсөн килтерелгән зыян һиҙелерлек.

Был етеҙ әҙәм эҙ ҡалдырырға тырышмаһа ла, уның кем икәнлеген видеокамераларҙан асыҡлағандар. Туймазы районы һәм баш ҡала полицейскийҙары берләшеп, 29 йәшлек Бәләбәй районы кешеһен тотҡандар. Ул Татарстан Республикаһына сығып китеп өлгөргән булған.

"Фокуссы"ға ҡаршы енәйәт эше ҡуҙғатылған. Әгәр ошо әҙәмдең мутлығынан зыян күргән булһағыҙ, полицияға мөржәғәт итегеҙ. Был хаҡта Башҡортостан буйынса Эске эштәр министрлығы хәбәр итә.

Фото: 02.мвд.рф