-9 °С
Облачно
Антитеррор
Все новости
Новости
31 Марта 2020, 13:05

Радий Хәбиров ҡул биреп күрешеүҙе тыйырға ҡушты

Кәңәшмәлә маскалар тәьминәтен арттырыу, рейдтарҙы көсәйтеү хаҡында һүҙ барҙы.

Был турала Республика башлығы бөгөн Башҡортостан Хөкүмәтендә үткән оператив кәңәшмәлә белдерҙе. Коронавирус пандемияһы ваҡытында бөтә донъяла кешеләр иҫәнләшеүҙең был формаһынан баш тарта, беҙгә лә сикләнеп тороу мөһим, тине Радий Фәрит улы. Бынан тыш кәңәшмәлә маскалар тәьминәтен арттырыу, социаль йөкләмәләрҙе үтәү, рейдтарҙы көсәйтеү хаҡында ла һүҙ барҙы.
Рейдтар ойошторола, сикләүҙәр индерелә, аңлатыу эштәре алып барыла, шул уҡ ваҡытта бөтә кешеләр ҙә хәүеф кимәлен тулыһынса аңлай тип әйтеп булмай. Сибай баҙарында күрше Силәбе өлкәһе фермерының ит һатыуы шуға асыҡ миҫал. Яуапһыҙ етәкселәр власть даирәһендә лә бар. Көйөргәҙе районының Ермолаевка ауылы биләмәһе башлығы медицина учреждениеһында эшләгән тормош иптәше менән сит илдә була һәм ике аҙналыҡ каратинды үтәмәй эшкә сыға. Радий Хәбиров яуапһыҙ етәкселәргә ҡарата ҡәтғи саралар күрергә ҡушты.
Башҡортостанға сит дәүләттәрҙән 9 меңдән ашыу кеше ингән, уларҙың күбеһе тикшерелгән, тик ике мең ярым туристың күрһәтелгән адрес буйынса йәшәмәүе асыҡланған. Был осраҡта инде хоҡуҡ һағында тороусылар ярҙамға килә. Рейдтар күрһәтеүенсә карантин режимын үтәүселәр арта. Әле сикләүҙе һанға һуҡмаусылар һаны 215 тирәһе. Тәүҙә был һан күберәк ине. Оператив кәңәшмәлә дауаханаларҙы, табиптарҙы әҙерләү, маскаларҙы тегеү күләмен арттырыу хаҡында ла һүҙ барҙы. Радий Хәбиров һанды 70 меңгә еткереү бурысын ҡуйҙы.
Өфө ҡалаһы хакимиәте башлығы Өлфәт Мостафин әйтеүенсә, парктарҙа, скверҙарҙа рейдтар ойоштороу ҡаралған. Был эшкә диңгеҙселәр, погран ғәскәрҙәр һәм башҡа хәрби ветерандар клубтары ағзалары ла йәлеп ителәсәк. Әлеге ваҡытта ирекмәндәр өлкән йәштәгеләргә аҙыҡ-түлек, дарыу алып килергә, йорт хайуандары менән саф һауаға сығып килергә ярҙам итә. Әммә бындай мәлдә мутлашыусылыр ҙа активлаша, шуға һаҡ булыу, өйгә белгән кешеләрҙе генә индереү мөһим тип билдәләнде кәңәшмәлә.
Шулай уҡ эштән азат ителеү менән бәйле кешеләрҙең спиртлы эсемлектәрҙе күберәк алыуы ла күҙәтелә. Радий Хәбиров, әгәр хоҡуҡ боҙоуҙар артһа, республика биләмәһендә ҡоро закон индереләсәк тип белдерҙе.
Радий Хәбиров ҡул биреп күрешеүҙе лә тыйырға ҡушты. Әлеге ваҡытта вирус таратыуҙың һәр бер алымын сикләү мөһим, ә иҫәнләшеү сирҙе йоҡтороу юлы булып тора. Бынан тыш сауҙа үҙәктәренә ҡарата тағы ла өҫтәмә талаптар ҡаралған, хәҙер фуд-корттарҙы, йәғни бер нисә кафены үҙ эсенә алған туҡланыу биләмәләрен ябыу ҡарала. Сөнки уларҙа халыҡтың күпләп йыйылыуы күҙәтелә. Республика башлығы әйтеүенсә, коронавирус беҙҙә таралмаясаҡ тип инаныу дөрөҫ түгел, сирҙең йәйелеү тиҙлеге көслө. Уға булышлыҡ итеүселәр ҙә юҡ түгел, мәҫәлән, антикарантин дискотекаһы ойоштороусылар. Радий Хәбиров режимды һанға һуҡмаусыларҙың һәр береһен яуаплылыҡҡа тарттырыу бурысын ҡуйҙы. Киләсәктә Башҡортостандың тулы изоляция режимына күсеүе лә ихтимал, Мәскәүҙәге һымаҡ.
Читайте нас в