Башҡортостанда коронавирус йоҡтороусылар һаны үҙгәрешһеҙ ҡала

Улар ун кеше. Был турала, һаулыҡ һаҡлау министрлығында үткән көндәлек брифингта хәбәр ителде. Белгестәр әле 7 мең ярым тест уҙғарған. Шик аҫтында 82 кеше. Өс пациент һауыҡҡан. Гигиена һәм Эпидемиология үҙәгенән белдереүҙәренсә, Башҡортостанға өҫтәмә рәүештә 8 мең тест-система ҡайтарылған. Был күләм тағы ла бер аҙнаға етергә тейеш.

Ҡулланыусылар хоҡуҡтарын күҙәтеү федераль хеҙмәте идаралығы кешеләрҙең үҙизоляция тәртибен үтәүен күҙәтә. Ведомство мәғлүмәттәре буйынса әле күпселек халыҡ өйҙәрендә ҡала.

200-ҙән ашыу тәртип боҙоу осрағы асыҡланған, административ яуаплылыҡ тураһында 30 протокол төҙөлгән.

Дүшәмбенән Башҡортостан мәктәптәре дистанцион белем биреүгә күсә. Мәғариф һәм фән министрлығы тулы әҙерлек тураһында белдерә.