«Аҙыҡ-түлек бүләк ит!» мәрхәмәтлек проекты старт алды

Һәр кемдең ҡатмарлы тормош һынауҙары алдында ҡалыуы мөмкин. «Аҙыҡ-түлек бүләк ит!» мәрхәмәтлек проектын ойоштороусылар ауыр хәлдә булыусыларға адреслы ярҙам күрһәтә.

«Лента» гипермаркеттар селтәре менән берлектә ойошторолған акцияның әһәмиәте айырыуса әлеге изоляция шарттарында баһалап бөткөһөҙ. Сөнки өйҙә ултырырға мәжбүр булған күп балалы һәм инвалид бала тәбиәләгән ғаиләләр, яңғыҙ әсәләр, йортһоҙ ҡалыусылар йәки оло йәштәгеләрҙең бер өлөшө аҙыҡ-түлек артынан магазиндарға йөрөй алмай.

Тап улар өсөн тәғәйенләнгән мәрхәмәтлек проекты сиктәрендә 10 көн эсендә Өфөлә генә 300 килограммға яҡын аҙыҡ-түлек тупланған. Тиҙ боҙолмай торған күп төрлө продукцияларҙы һатып алыусылар ҡалдырған. Бының өсөн «Лента» гипермаркеттарында махсус урындар булдырылған. Изгелек ҡылырға теләүселәр тауарға хаҡты түләгәндән һуң үҙенән артҡанын ошо контейнерҙарға һала ала.

Тупланған ризыҡтарҙың бер өлөшөн ирекмәндәр 12 йәшлек Шамилға тәғәйенләгән. Бер йыл элек табиптар малайға Элерс синдромы ҡуйған. Был сир менән Рәсәйҙә бер нисә бала ғына яфалана. Шуға ла әсә кеше төрлө йәрәхәттәргә тиҙ бирешеүсән улын яңғыҙ ҡалдырып китә алмай. Тормош һынауҙары алдында ҡалыусы ғаиләгә изге кешеләр ярҙам күрһәтте. Бының өсөн Эльвира Ғәлимуллина аҙыҡ-түлекте өйгә килтереүҙәрен һорап мәрхәмәтлек проектында ғариза ҡалдырған. Күп тә үтмәй ирекмәндәр фатир ишеген шаҡый.